Psa 88 | YON | STEP | Yook, God yaningko kankooni yook Korah ye karub dana meed yiman kui. Yook ambo bi ye karub yeman. Mahalat leanot ye kiwaan wingki yeman. Maskil ye yook Esraman Hemanbed wongkoon. O Yariman , ne bobni yaa burudande nendi ye God, aronkiyiib amkiyiib kuu eb arinambo ari baandimain.

Psalms 88

Yook 88

Yook, God yaningko kankooni yook Korah ye karub dana meed yiman kui. Yook ambo bi ye karub yeman.Mahalat leanot ye kiwaan wingki yeman.Maskil ye yook Esraman Hemanbed wongkoon.

1 OYariman, ne bobni yaa burudande nendi ye God,
aronkiyiib amkiyiib kuu eb arinambo ari baandimain.
2 Korondewo ne kurikuri kee eb arinambo ari monok,
eb kerendem kan amonombe ne yaa koweneb ne baandi wengambere.
3 Kedi, ne niindem aom kuu dabab yemoon demboon,
kwane ne kuu bobniin dia keroon.
4 Ne ande yoworandamiibdan kuyaom kuu ye kuu ma ande yedmimaib,
Ne kuu aromkono korem wonoonman areb keraan.
5 Ne kuu nenwene dukniwendaniib yaa kowiwen,
ne kuu bobnoonman ye bobkonombon yiri angkimberemoon areb keraan kui.
Ebbed ma meenewindo ye karub areb keraan,
eb awawe oonewi kuu ne yaa menebokban kui.
6 Ebbed ne kanduneb dem ambab yiri kaanewen,
dem kumunmo kongdem yiri kui.
7 Eb norin kuu dabawiib ne ari kereknewen,
oknondok areb eb arud kuu ne ari dabunewen kui.Selah
8 Ebbed ne angkodmia kuu ambengkandeneb
ongmeweewa yi kuu ne yaa akmendanduwiwen.
Ne kuu wii aom kaanemoon areb kereni bunangka angkadirinban keraan.

9 Ne mimyob wandembaraan kumbed ne indob kuu aromkonoyiibban keroon.
OYariman, aronki korem eb yaa baandimain,
kwane ne dingki kuu eb yaa benkoobe baandimain.
10 Binangke eb kuu anam andi yeman kuu dukniwendan yi dowad ongmaneewoo? Dowan!
Dukniwendan kuu yaro dembe ewaningko kankoonaniiwoo? Dowan!Selah
11 Eb womoniyiibban ye mimyob dowaken ye weng kuu bobkonombon yiri daandaniiwoo? Dowan!
Eb ma korondiyiibban no awinembiri ye kerekmen ye weng kuu monmarimbon yiri daandaniiwoo? Dowan!
12 Binangke eb kuu anam andi yeman kuu kumunbon aom doriibdan kuu yikaadoo? Dowan!
Eb yorokmo kamenabi kuu korem nonondandimbon aom doriibdan kuu yikaadoo? Dowan!
13 Kumban, oYariman, eb yaa awawe ande baandimain,
amkimo kuu eb yaa kurikuri kamimain.
14 OYariman, komandewed ne kuu akmendanduwewen?
Komandewed ne yaa kuu wedme yangmad danduwewen?
15 Ne kuu kewed yaambed mene kibikee ne ari dabawiibmo kereni mene bobni dia keroon,
kwane uniwon karakwon yeman ongmenabewen kumbed durud yewed kandeni miin yiminban keraan.
16 Arud denobewen kumbed neene kan yiri kowoon,
kwane uniwon karakwon yeman ongmenabewen kumbed neene monmarewen.
17 Kuyeman kuu aronki doboob ne yaa urok areb derebe kanawanewandoon,
kwane ne nen yukne dowan keroon.
18 Eb kuu yubudkawidaniib nangkodmiayiib kuu ben ambab angka nongkobewen,
kwane kumun aommo nembirimo keraan.